سعودی حکومت نے نطاقت سعودائزیشن پروگرام کے پہلے لیول کے تحت آنے والی کمپنیوں پر غیر ملکی ملازمین کو چار سال سے زائد ملازمت پر رکھنے پر پابندی عائد کردی ہے جبکہ جدہ چیمبر آف کامرس اینڈ انڈسٹری کا کہنا ہے کہ اس فیصلے پر عملدرآمد انتہائی مشکل کام ہے۔ سعودی وزارتِ لیبر کا کہنا ہے کہ یہ پابندی تجربہ کار اور سعودی عرب میں پیدا ہونے والے غیر ممالک کے شہریوں پر بھی لاگو ہوگی اور 25 اکتوبر سے اس کا اطلاق ہوجائے گا جبکہ 6 ماہ بعد قیام کا عرصہ 2 سال تک محدود کردیا جائے گا۔ وزارت کا کہنا ہے کہ بیرون ممالک کے ملازمین کو یہ اجازت ہوگی کہ وہ اپنا ریذیڈنس پرمٹ پلاٹینم اور سبز نطاقت کمپنیوں میں منتقل کرسکیں۔ نئے قانون کے تحت سعودی کمپنیوں کو مختلف درجات میں تقسیم کیا گیا ہے اور ان میں سے پہلے لیول کی کمپنیوں پر زور دیا گیا ہے کہ وہ سعودی ملازمین کو زیادہ سے زیادہ جگہ دیں لہٰذا انہیں پہلے مرحلہ میں بیرون ممالک کے لوگوں کی ملازمت چار سال تک محدود کرنے کو کہا گیا ہے جبکہ بعد میں یہ عرصہ دو سال کردیا جائے گا۔ ان اقدامات کو مقصد پرائیویٹ سیکٹر میں سعودی شہریوں کو زیادہ سے زیادہ ملازمین فراہم کرنا ہے۔